مقاطع بمناسبة العيد

أهلين وسهلين بأعزائي القراء

أول شي كل عام وانتم بخير والله يعيده علينا وعليكم بالصحة والعافية يارب

أعتذر عن الانقطاع وكان بسبب اني سافرت مدة اسبوع من اول مابدت اجازتي

بصراحة كنت محتاج نوع من الاجازة ، عموما اليوم رجعت للرياض من ديرتنا ماكان ودي اني راجع بس الشكوة لله عندي خرابيط واجدة لازم اسويها قبل بداية الدوام

ولا الجو في الديرة هبال امطار وخيور وجمعه الله يديمها

مدري ليه تذكرت هذي الابيات كل ماحنيت للسامري

خذوني معاكم ودي اروح ...على الزين معسول الشفيه

أنا في هوى المجمول مذبوح ... ذبحني بلا ذنب وخطية

عموما انا رجعت الرياض وان شاء الله الرياض نورت فيني

واليوم من قمت من النوم وانا مريض لوزي منحدرة الى الاسفل وخشمي وديان تجري ، هالمرض غريب جاني فجأة واليوم يوم وصلت الرياض وانسدحت وبديت افكر في سبب هالزكمة تذكرت شي

امس الليل كنا في استراحة وكان فيه واحد من عيال ولد عمي البثرين الشقيين ، ماانكر انه يعجبني لكن امس كان ينطط بينا يالرجال ويكحكح بدون مايحط يدينه على خشته والظاهر اني مابغيت شي

مااقول الا

لو اتصل بي وطيب الخاطر بكلمة ... كان اتصبر على ماجاني ياربي

ادري بتقولون وش دخل امها في السالفة بس الدعوة سواليف يعني لا تشرهون

الا مار على طاري الشعر سمعت هالابيات وجازت لي

كذبت وقلت مااحبك ... عشان ابعدك عن دنياي

ولا بي اوقف في دربك ... ولابي اظلمك وياي

أقول الظاهر اخلص الموضوع ابرك :)

تحياتي يالحلوين