فاهمين ياشطار ياحلوين؟

أمس الصباح طلعت من الدوام عشان اخلص شغل لمدة نص ساعة ، وكانت الإذاعة مفتوحة على الشيخه ام بي سي اف ام

وتعرفون فترة الصبح يكون برنامج صباح الرياض اللي تقدمه مقدمة اسمها مهى ، اظنها كانت تسوي دعايات من قبل للإذاعة ولبعض المعلنين. في فترة جيتي للدوام الساعة السابعة مااسمع الا اشياء روتينية من هذي المذيعة يعني حركة السير واخبار الرياض وكلها اشياء تقراها او تكون محادثة تلفونية، ودائما كان عندي بعض علامات التعجب من هذي المذيعة اللي استغرب اسلوبها وان كان يعجبني امتهانها للهجة المحلية نوعا ما

المهم خلال طلعتي سمعتها تقرى تقرير باللغة العربية بالشكل هذا " والتقرير الذي صدر عن مجلة ... تقول المجلة أن السمك مفيد للرجال عدا النساء وذلك لتخفيف خطر التسمم بالزئبق ، وبعدين تستطرد وتقول: يعني السمك زين ويصلح للرجال ومفيد ومايصلح للنساء عرفتو كيف، ثم تكمل التقرير وتقول وأكد التقرير أن اكل السمك يجب ان يكون متوازن ولا يكون بشكل كبير حيث يؤدي الى رفع نسبة الكلسترول في الدم فتناول السمك في خلال فترة أقل من يومين قد يكون خطرا ، ثم تستطرد الشيخه الفاهمه تقول: يعني الرجال ممكن ياكلو السمك كل يومين مو كل يوم علشان مايرتفع عندهم نسبة الكلسترول في الدم عرفتو

استغرب سطحية التوجيه الإعلامي ، هل اعتقدت أن المستمعين لا يستطيعون فهم هذا الخبر؟ ام تريد ان تملأ وقت برنامجها بأي شي، أم اعتقدت ان هذا التقرير هو طلاسم وتحتاج لمن يشرح؟

الإجابة اتركها لكم

فاهمين ياشطار ياحلوين؟